Herminigildo A. Sanchez

Hi Herminigildo "Hermie" A. Sanchez, in usa nga pintor, magsusurat hin kanta, tagsurat ug paragsiday. Hiya in natawo ha Catbalogan, ha probinsya han Samar hadton ika-28 han Nodyembre tuig 1974 kanda Amado Solibaga Sanchez nga taga Tagapul-an, Samar ug ni Ester Jadaone Apolinar nga taga Basey, Samar. An iya kapikas han kinabuhi amo hi Ena Dacles Castillo nga taga-Catbalogan. Mayda hira duha nga anak, hi Johaness Paolo C. Sanchez ug hi Nino Paulinus C. Sanchez.

Hi Herminigildo kumo magsusurat hin kanta in nagin finalist han magkadurudilain nga kompetisyon han Balaug Songwriting Contest, ug nakakuha han ikaduha nga pwesto han tuig 1999 ha paisan-isan nga Ibabao Songwriting Competition ha Syudad san Calbayog. Nagdaog hin ikaduha nga lugar ha 2008 Gawad Komisyon, pinaagi han siday ug susumaton.

Nag-atender hiya han 43rd UP Creative Writing Workshop ha Mindanao han 2004, nagin kaungay han 13th Iligan National Writing Workshop han 2006, 4th ug 5th Lamiraw Regional Creative Writing, UP Viswrite ha UP Tacloban, nag-attender han Filmwriting Workshop ni Jerry Gracio han 2011, ug Playwriting Workshop hadton 2012.

Nagin estudyante niya ha kolehiyo an bag-uhan nga paragsiday nga hi Julan Shirwod Nueva. Usa hiya ha mga tawo nga ginhahangad hini nga rapper ngan spoken word artist pag-abot ha pagsurat han mga siday nga nagpapauswag ha literatura winaray. Hi Jem Villa ug Zhep Gonzales in iya mga estudyante dida han nagpapart-time hiya ha St. Mary's College of Catbalogan, nga nagin mga mangaranta ug kompositor ha Winaray nga puplungon.

Han bulan han Mayo 2010, iya ginpatik an HAGSI o Haglipot nga Siday. Iya ini orihinal nga pamaagi ha pagsurat hin Siday agud madali an paghimo, pag-intindi ug pagluwas.

HAGSI

Kape

Kaupay han aga

adlaw mahimaya

kape nagtitikarasa

kun tugbang an hinigugma.